ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានផ្ដាំសារជាថ្មីទៅកាន់បរទេសទាំងឡាយកុំឲ្យលូកដៃចូលកិច្ចការផ្ទៃក្នុងរបស់ប្រទេសកម្ពុជា។ ការលូកដៃចូលទៅក្នុងកិច្ចការផ្ទៃក្នុងទៅលើសំណុំរឿងតុលាការណាមួយនឹងមិនអាចឲ្យអ្នកដែលជាប់ទោសទាំងនោះរួចខ្លួនឡើយ។
ថ្លែងនៅក្នុងជំនួបជាមួយនឹងកម្មករជិត ២ម៉ឺននាក់នៅក្នុងខណ្ឌពោធិ៍សែនជ័យ រាជធានីភ្នំពេញ សម្ដេចតេជោ ហ៊ុន សែន បានលើកឡើងថាទោះបីជាខ្មែរមានសញ្ជាតិពីរក៏ដោយការប្រព្រឹត្តកំហុសនៅកម្ពុជាគឺត្រូវតែជាប់ទោសនៅកម្ពុជា។
ការអន្តរាគមន៍ពីប្រទេសទៅលើជនជាតិខ្មែរដែលមានសញ្ជាតិពីរនេះ នឹងមិនអាចឲ្យគេមានសេរីភាពនោះទេថែមទាំងមិនត្រូវបានលើកយកមកស្នើសុំការលើកលែងទោសឬបន្ធូរបន្ថយទោសថែមទៀត។
សម្ដេចថា៖ «ទោះបីបរទេសមកធ្វើកំហុសនៅស្រុកខ្មែរក៏ត្រូវមានទោសនៅស្រុកខ្មែរដែរ»។
សម្ដេចក៏បានលើកយកករណី កញ្ញា សេង ធារី ដែលហៅថាអប្សរាក្បាលត្រងោលមានសញ្ជាតិពីរដែលជាប់ពន្ធនាគារនិងមិនត្រូវបន្ធូរបន្ថយនោះទេដរាបណាមានបរទេសលូកដៃ៕
